caleyando

El vienres pela tarde ñació un plan. Tal vez nublaos pola influecia del mate, tal vez peranimaos pola facilidá del deporte na play, marcamos la ruta. Lo únicu non suxetu a variables: a les 9:00 en La Gruta.

A les 8:30 pongome’n marcha, de manga y pierna corta, con un periódicu’n pechu, confío’n que llevante la ñebla, y que eses gotes que noto de vez en cuando, nun seyan nada.”ya pue abrir” pienso cuando veo llegar al restu con alguna chaqueta, mangues y perneres; si non, la que m’espera va ser fina.

Ponemos rumbu a Trubia, pa xirar a la esquierda direición Proaza, sigue zarráu, cuando nun se como, en dexando atrás una peña apaez un cielu azul, en sin rastru de nubes. Paez qu’entamamos a calentar…

En Caranga decimos adiós a la ruta que teniamos pensada el vienres pela mañana, Cobertoria y lo que viniera pela cuenca.

Vamos pa Teberga, La Plaza, unos 7 kilometros suaves parriba, hasta llegar a La Cueva Güerta, onde una baxadina nos planta de repente nuna rampa del 12%. Dexamos que marche Pupilo y que lu intente seguir Ornimans, pa que se crezan. Sete, Gon y yo decidimos tomanos los 13 kms al 7,2 que falten con calma, disfrutando de la vista, como se suel dicir. Ye un puertu comodu, polo menos con un 25 atrás, pero hai que llevar agua, qu’hasta casi arriba nun ves una riega de la que se pue beber, y mas arriba entovía un bebederu.

Al paecer hai unes vistes perbones arriba’l puertu (y más fontes), pero los retrasaos nun nos merecemos disfrutales y hai que tirar prontu pabaxu, nun sea q’anocheza.

Pa mi idea que falta otru trozu de señal

Tal vez seya el mes d’escasu entrenamientu que llevo, los menos de 300 kms que fici la semana pasada, pero yo creo que lo que peor mi sento, fue’l aire’n pasando’l cordal. De Ventana a Barrios de Luna la verdá que nun tien munchu misteriu la cosa, rectu pallá, hasta pasar por debaxu esi puente que tantes veces cruzamos y en seguida desviase pa onde diz Pola de Gordón.

Equí la falta de riegu produz cierta tensión, sobretou viendo pa onde xube la carretera. Facemos un asaltu per dos frentes a La Aralla cola esperanza

d’arrebatar l’obxetivu H2O al enemigu. Consigo llenar el bote y intento contautar con Sete por radiofrecuencia, con vistes a indica-y les coordenaes onde toi, pero resulta imposible, colo que trato d’alcontrar la salida pensando que tuvo que nun pudo penetrar el frente. Perdíu pel pueblu, siento a Sete atrapáu por una vieya sorda, nun debe tener agua nel chigre… Rescato al compañeru y garramos más agua, que falta nos va facer viendo aquelles cetes.

Aralla, 1260 m., 54 habitantes

Sin acabar de xubir (Pupilo anda despistáu y llegó arriba, y tuvo que dir Sete a buscalu) garramos un cruce pal norte, alexandonos de La Pola Gordón, con vistes a dir a parar, a poder ser, a Villamanín.

Siguimos per carretera típica del llugar, tipu ruffles a un pueblu de cuyu nome nun soi quien a’lcordame, llenamos otra vez les llecheres y llegamos a Villamanín…que aliviu ver carretera conocía, mesones y gasolinera, onde aprovechamos pa llenar el depositu.

Paez que a Gon y a Pupilo nun-yos pesa’l buche, y salieron escopetaos, kilometros picando parriba, aire’n contra, salimos a 30 y llegamos arriba a 20. Nel Parador, como’l so nome nun indica, nun paramos, buenu, yo sí, a poner el periodicu (por facer algo con él) echar mediu llitru al suelu, y meter otru pa dientro, y tirar la botella.

Tando ya en casa, nun tien muncha más ciencia la cosa, a nun ser que les reserves tan cada vez mas baxes, faciendo que prenda la radio, como vien siendo tradicional, y ponga la de Nalón, Cuando salí de Cabrales, Tengo de rondar to valle, y alguna berrada más.

En resumen, 7 hores y media rodando, 205 kms, la rodilla recuperada ya nun sabe como s’apellida, los brazos como conos d’obra, ducha, ensalada de a kilo y pa la cama.