caleyando

Dempues d’una semana d’entrenu, per dalgun sitiu guapu y cercanu, como la subida d’Hevia a Molleo pa baxar a Ciañu, La Camperona, La Casilla; y una carrera en Cancienes, volvimos tar de vuelta en vuelta, que más bien podía llamar espiral, porque nunca diera tantes vueltes n’una mesma vuelta…

Salimos al través de la reserva natural de las marismas, güel a escabeche, prontu se fae una escapada, pero nun voi finu, así qu’espero un pocu y como al km 10 arranco a ver si los pillo, en sin alcordame del conseyu’l mio director de qu’esperara tranquilu a pasar el primer puertu. Paso a un par d’ellos y nun me siguen la rueda, voi acercandome a la escapada, tornamos a la izquierda y… comienza puertu, miro p’alantre y veo que nun m’acerco, miro p’atrás y veo al pelotón enfiláu… son sólu 2 kms, pero son bastantes pa dir quedando a cola y xustu al final, cuando lo más suave de la xubida, quedame atrás.

Unos 5 kms, calculo, persiguiendo con Cuco y otru chaval y por fin toi otra vez nel pelotón, alcuerdome de cuando intente garrar aquella escapada, que por supuestu, pillaronlos tamien nel puertu (La Mortera, una de tantes). Hai dalgun repechu duru per ehí y salimos a la xeneral, de vuelta pa la capital de la Trasmiera. Baxo al coche por botes, unu pa la bici, otru pa la bici, unu pal bolsillu, otru pal bolsillu, unu pa dentro la camiseta…pinché, si, si, que pinché, que pensaben que taba de broma y nun me creíen. Total que paro, cambio la rueda d’atrás, y a perseguir al pelotón cargáu con 5 botes y en sin albarda. Al ratu, metíu ente coches llego al grupu y reparto agua a los compañeros, cuando me doi cuenta que paez que falta xente, partiose el pelotón en dos.

Xubimos Ajo, 2.5 kms com triple carril , 187 pulsaciones por minutu a la parte d’arriba, voi h.odíu. Tamos a mitá de carrera más o menos y d’equí p’allá, poca cosa, una carretera mui mala al final, y meta nun polígonu d’Heras, llegamos algo más de 50 corredores a casi 9 minutos de los primeros. Nun sabemos como, el Caimán llegó sólu, 9 minutos dempues.

(estes en sin nudu son meyores)

Salimos el sábadu de la villa corbatera, con Pupilo de lider de los esprines especiales. Tengo que pasar los repechos de los primeros 50 kms, hasta Quijas, dempues tengo como 10 kms llanos buenos pa mi. Cuco andaba desatáu, sólu lo intente una vez y volví pa la oficina. Arrancó Sete per una calle con carriles estrechos y munches rotondes de Torrelavega, animelu un pocu pola emisora, pero quedo ente los escapaos y el pelotón y veníen los 3,5 kms de La Montaña, vamos que taba claru lo que diba pasar, tan claru como que yo coroné un pocu detrás del pelotón. A sabiendes de que taba pocu detrás Gon, baxé rapidu, con mieu que me puñara (mirai el post anterior… y vais saber lo que falo) y pesqué enseguida al grupu.

Llegamos al mesmu circuitu malu d’ayer, pero güei hai que pasar 3 vegaes. A la segunda reviento la rueda y espero al coche. Cambio rueda y a sufrir yo sólu per ehí, que una cosa ye que presten les caleyes, pero otra ye que vayas per una carretera y caigas nuna poza. Garro una lata que mi ofrez una señora y guardola pa lluéu. Toi un pocu detrás del coche, quedo otra vez sólu y ya por fin na carretera buena voi pasando coches, vuelvo detrás del míu y entro al pelotón, qué como vien siendo habitual, partierase en dos. El nuestru grupu quier partise, pero seguimos xuntos hasta la última vuelta. La mitá llegamos a unos 2 minutos y el restu a casi 4. A los 18 minutos lleguen los últimos pa quitar la pancarta meta.

L’últimu día hai qu’asegurar los esprines de Pupilo de momentu, y llueu si pueden la xeneral ente él y Chema, que tan nel grupu empatáu a tiempos col primeru. En resumen, aguanto casi tola etapa alante tapando a Pupilo, que puntúa en Unquera y ya tien casi aseguráu el maillot los esprines. Colocome detrás del lider, que ye bastante grande y voi comodu tras d’él, así hasta casi llegar a Puentenansa, onde empezaba la griesca con dos vueltes por Ozalba. Pongo a Pupilo a rueda’l d’amariellu, faigo-y saber a Chema sin abrir la boca que voi reventáu y quedome pa la parte d’atrás del pelotón. Un collaciu dame animos falandome de la grupeta, tomo un cacharru glucosa a ver si recupero d’esti baxón de repente, pero pa mi idea que nada, ehí sigo hasta entrar al puertu, intento pasar p’alantre cual ave fenix, pero quemo nes mios cenices y los dexo.

Un cachu arriba veo a Gon y a Danilo, y-yos doi un voz, pillolos y ya paez que voi un pocu meyor, supongo que pola compañía, porque la velocidá nun cambia munchu. Baxando xuntamosnos una grupeta de 8 o así y vamos pocu a pocu. Pasamos per onde la meta y dalgunu posase, pero’l restu seguimos p’arriba, garrome a l’ambulancia y falo un ratu col conductor, danme una lata dende la cuneta, echo-y un tragu, do-y el restu a Danilo, y pa la ventanilla otra vez. Arriba tomamos otra lata y pa baxu otra vez. Pasamos pela carretera per onde vamos na carrera de Panes, de Merodiu al collau H.oz pero del reves y diendo yo tirando pon l’ambulancia la música pelos altavoces, taba guapa una version mediu reggae de Desesperada.

Ya tamos acabando, hai que llibrar el fuera control, asi que nos enganchamos a la furgoneta y vamos unos kilometros como tiros pel llanu, al final sobraronnos 3 minutos pal fuera control, por pocu… como los 30 segundos que dexaron a Danilo en sin farolillu roxu.