caleyando

Diba ser un día épicu, con meta a 1520 metros d’altor, allá onde acaba lo conocíu. Esti miercoles 19 alcontramonos Nardín y yo per Viella, y con Jurgën, Danilo y Xingu en El Berrón. La Gargantá en sin priesa y llenamos los botes na baxada. Garramos Nalón p’arriba, que siempre ye mui prestosu, hasta pasar La Pola pa cruzalu pel puente La Chalana…eso si que presta, aunque esta vez nun canté al pasar, canté al parar na fuente Entrialgo. De la que recargábemos pasó una grupeta con un faltosín que nun se que decía de bolses…

Tomamos camín pa Villoria y pescamos a la grupeta d’antes, llueu de tenelos pasaos volvió a soltala el faltosín, qu’amás debe ser graciosu. Tolivia y entamamos la xubía. Los dos primeros kilometros son duros y Jurgën y Xingu, nun ataque de valentía, tomen la delantera, yo nun voi finu y sigo la rueda Danilo, Nardín vien tamién. Paso un relevu, pasa Nardín y queda atrás pa nu subir munchu’l pulsu. Sigue tirando Danilo y vamos viendo a los escapaos. Tiro y nos acercamos, Nardín vien manteniendo la distancia, tenemoslos a tiru y baxo un diente, pescamoslos baxo dos dientes y arranco fuerte, demasiáu fuerte, siento alguien detrás, Jurgën y Xingu, subo piñones y mantengo’l ritmu, quedase Jurgën, ya tamos llegando y se que Xingu va ganame al esprint, un diente menos, avanzo, miro y voi sólu, cuando ya me confío meto’l piñón grande y miro con tranquilidá’l cartel: La Collaona 850m.

Reagrupamos y vamos pa Cabanaquinta, remontamos el ríu Ayer, pocu a pocu, vamos ganando metros, Felechosa, agua, Cuevas y entama’l puertu , queden 11 kms hasta’l Puertu Braña (p’allá del cordal ye santu). Hai aire, de sur, pero paez qu’equí arriba ye más frescu. Yo voi sin ganes, Jurgën sin fuercia, Nardín nun se como va, pero nun va munchu; Danilo tira de nosotros, ye’l que más ganes tien de llegar arriba. Xingu nun tien tantes ganes, pero a la gueta d’una ya tradicional esplosión, vase sólu. Nostros mantenemos un ritmu cómodu, qu’entovía queda. Pa Jurgën nun ye tan cómodu y quedase un pocu, pa volver pescanos y volvese quedar. Tamos no más duru, un kilometru de casi un 10% de desnivel, pasamosu y vemos al fondu la nube, chispea, ta negru arriba, hai que dar la vuelta. Xingu va un cachu arriba y Danilo arranca a buscalu, sigolu un pocu y pongome a la par con cara sobráu, pero ta costandome y paró, espero a Nardín y vemos como para Xingu y da la vuelta con Danilo.

Baxamos, agora sí, vino la nube, ta’l agua frío como en febreru, amás hai aire y baxamos a 70 por hora. Xelaos. Xuntame con Danilo y decimos de mirar a ver onde atechamos, paramos nun bar en Cuevas y falta Xingu, que-y prestó la recta del final y escapó. Prestonos mas a nosotros el cola-cao que tomamos, mientres él nos llamaba y nosotros sin cobertura, ya atecharía per ehí pensamos tranquilos nosotros.

Bonu, paez que ya pasó la nube, vamos pa baxu. Llama Xingu que ta nun pueblu, que da la vuelta p’alcontranos. Paramos a la fuente Felechosa y seguimos p’allá. Pocu antes de Cabanaquinta encontramoslu y Nardin dase cuenta que Xingu ta pincháu. Como nun hai mal que por bien nun venga, paramos en Cabanaquinta a qu’igüe la rueda y mientres nosotros vamos pal Unico, agora Uniper. Cocacola y pastelinos que vamos pa Morea. Esti tramu ya lu pase en 360 (II) pero non lu conté (quedeme baxando la Collaona y tuvi dende Cabanaquinta hasta Morea p’alcanzar la grupeta).

Tranquilamente vamos pa Uviéu, parando primero n’Argame a por agua, que ye lo nuestru, xubimos el Caleyu, vese que nun taba mui cansáu, porque nun se mi fizo tan duru como de costume (cada vez que paso pel Caleyu llevo ya 4 o 5 hores) y nin canté nin nada.

155 kilometros en 5 h 40 minutos, 120 pulsaciones per minutu de media y 184 de másima , na Collaona, 12 minutos a más de 165 ppm, mui fuerte nun fuimos; 82 pedalaes per minutu de media, 27.880 pedalaes, 40.800 llatíos, 4 colacaos y 500cc de cocacola

si lu toma’l ciclista faise’l amu la pista