caleyando

Entama la pretemporada, tiempu de previsiones y revisiones, un güeyu al mañana mientres l’otru mira l’ayer. La selmana que vien empezaré col ximnasiu, esta semana na mas que fice que caminar un pocu, media hora’l primer día, al otru una, hora y media, y güei hora y 40 minutos. Sali pal puente vieyu, garré la vía les canteres, y per ella voi hasta Llugarín, esquivo unos camiones y ya voi tranquilu per una carreterina hasta Quintana, más arriba ta Lladines, de momentu demasiáu arriba. Ellí taben una señora mandando callar al perru, y un señor con un carretilláu de mazanes. Hai bastante, pero tan cayendo ya toes y tan verdes entovía. La sidre tolos años tien un gustu distintu, será l’añu lo que-y da el sabor a la mazana?

Esti añu ta ácida, presta pero al final dexa un gustu raru, una corriente que atraviesa la mandibula d’abaxu arriba, los güeyos llorosos. Calló prontu, tando verde. Nesti tiempu, veíes la mazana nel árbol, sabiendo que va caer, pero pensando qu’entovía ta verde, tovía queda tiempu. Garres alguna, verde verde, ta ácida pero presta igual porque sabes qu’entovía nun ye’l tiempu, que ya tendrá tiempu a madurar. Pero nun maduraron, morrieron verdes, quedasti cola mandíbula ellétrica, los pelos encrespaos y los güeyos, la cara, salaos.

Asemeya a una escapada. Dempues del últimu post qu’escribí garré la escapada. Llevaba tiempu viendo’l recorríu, yera prestosu, y con recorríos así, casi nun fai falta esforzase pa pescar la escapada buena, lo guapu del recorríu que vas viendo faite dir en cabeza del grupu, y así, como quien nun quier la cosa, garres la escapada.

Al principiu cuesta echala palantre, hai repechos duros y notes qu’al restu la escapada cuesta-y pasalos, pero sabiendo que merez la pena, poneste a cola pa que la escapada suba al so ritmu. Pasaos los repechos, non sin esfuerzu, paez que la carretera ye llana, vamos a toa velocidá, pero pocu dura, pocu a pocu va garrando pendiente la carretera, y por atrás el pelotón se organiza y tira. Hai que facer un esfuerzu pa poder llegar a meta, pero golpe a golpe, atrás son mas equipos los que tiran, aumenta el so ritmu. Entós sabes que la escapada nun va llegar a meta, ye imposible.

Ye duru, sabes que la escapada nun va llegar, ye una escapada destinada a morrer. Pero ye tan prestosu que aun sabiendolo nun yes quien a desentendete, sigues sufriendo, tires tou lo que puedes, nun puede haber nada meyor que la sensación de la escapada, ye droga, nun puedes dexala, aunque de muerte mate. Pases relevu y por momentos olvideste de que nun vais llegar, imaxines el podiu, casi puedes tocalu. Tal vez pudieres llegar a dalguna meta volante, sería guapu, pero quien sabe si nun sería mas duru entovía que nun ver el podiu, subir a él sabiendo que nun yes el que ganó, imaxinando la gloria del ganador con muncha más fuercia qu’agora. Ye la carrera más importante.

Pero la escapada muer,  fai 24 díes llegó’l pelotón, fai 23 díes te pescó, alcanzóte, pasóte per enrriba, pisóte, nun fue la goma les cubiertes lo que te pisó, fueron les cadenes, los dientes de los platos, cada diente de cada un de los piñones, afiláu como una espina, lo que se clavó nel to cuerpu. Nun se ven les ferídes, son de les que más duelen, tan enbaxu la piel, el sangre quier salir y nun tien per onde.

 La escapada fue guapa, la meyor escapada del mundu, con tou y les ferides, que ya sabíes que diben venir, nun se puede tar meyor qu’escapáu. Pero esta escapada acabó contigo, tas machacáu, sabes que vas pillar más escapaes, pero agora nun tienes ganes, necesites tiempu pa recordar tolos detalles d’ésta, intentar curar las h.eridas, qu’escuecen, desencaxen la mandibula, faen saltar les llarimes, el sangre que nun puede salir pela piel salta pelos güeyos, ácidu, como la mazana, con sentencia en firme, destinada a caer, besarkada handi bat, laister harte.