caleyando

Queden 15 díes pal primer oxetivu. Home, esto nun son oxetivos como’l que prepara’l tour, o sin llegar a tantu, la xente que de verdá disputa les carreres na mio categoría, la de plata. El casu ye llegar lo más fuerte que se puea.

Dempues de güei, un día de descansu, aun sin dexar d’entrenar, queden 15 díes y sólu una carrera, más o menos, esti ye’l plan pa d’equí a allá por díes:

-miercoles- series en subida, sin forzar a tope (87%, 174 pulsaciones por minutu), 1km col desarrollu mui duru y 500m mui blandu, 4 veces, lo xustu pa subir Santumiyano. Llueu rodar un pocu y volver a facelo.

-xueves- 4 /4 y media hores, col mesmu númeru de puertos más o menos. Forzando algo más nel final de los puertos (según como responda’l cuerpu, 188, 192, 195 ppm…)

-vienres- 3 / 3,5 hores por terrenu onduláu, apretando na más que un pocu en dalgún repechu.

-sábadu- lo mesmu que’l primer día, aunque toi viendo que siendo sábadu, ye fácil que se pueda allargar algo más el recorríu, o dir pa otros sitios. El casu ye facer les series, coles que se supón qu’amás d’ameyorar la fuerza (more…)

Desperté sintiendo llover, pensé n’esperar el cuartu d’hora que quedaba hasta que sonara l’alarma, pero al pocu levanteme a asomame pela ventana. Llovía bien, pa tar sin camiseta na ventana a les 7 la mañana nun taba fríu, taba fresquino, prestaba. Ente la oscuridá del cielu paecía que queríen salir claros ente les nubes.

Almorcé y volví a la ventana, ya pintaba meyor la cosa, vestime, garré la bici y tiré pa Fran. Dempues de dos semanes sin entrenar, con una semana santa pel mediu, paez que va unu raru na bici, aunque fici trampa y antes d’ayer salí a dar una vueltina pa mover un pocu la manivela. Voi pa Uviéu y m’alcuerdo de cuando la xente flipa cuando digo que fui a casa mio güela en bici, que ye pocu, que tenía qu’haber entrenáu más. Pensando no que me queda güei, doi más valor a la xente que se prepara pa dir a algún sitiu mediu lloñe, que pa mi ye menos que un entrenu.

Llega la avenida del mar, meto un palancazu a la maneta pa subir una riestra piñones…pero sólu queda ún, va la cosa bien. Llego a Fran, bah, nun hai muncha xente, amaneció pa quedar na cama, la verdá. Nun llegué a tiempu pa la foto de la salida, quédame la de la llegada. Salimos a un ritmu bien cómodu, taba vistu que nun dibamos seguir así hasta allá, en pasando La Secá entamo la griesca, a pocu que te despistes pierdes rueda y quedes p’atrás, que ye lo que me paso a mi, igual qu’el añu pasáu, por Nava ya diba a relevos con una grupeta rezagaos.

Dibamos fuerte, a algúnu conocialu de vista, otru de rodar algún ratu perehí, otros de nada, otru yera’l mio primer entrenador, de tou, y  así un detrás del otru, fuimos lanzandonos y pescamos otra grupeta llegando a L’Infiestu. Ya quedaba pocu pal avituallamientu en Villamayor, nel polígonu de la recta de Lléu. Esti añu eché en falta unos bollinos con tropiezos de chocolate, pero nun m’atreví a decir nada.

Salimos de Villamayor y entama la cabera y definitiva parte de la “marcha”. Como ye normal en mi, quede falando con un paisano, que diba tiempu que nun lu veía, y cuando quisi salir taba l’últimu, con otru chaval. Bueee,  allá que fuimos los dos, que ya vimos enseguida que nun dibamos pillar a naide, falando de carreres, de marches, carreteres guapes, como la de Pedroveya, y resulta, que ya ye casualidá, que conocía esti blog. Por fin acabó la carrera y entamo la marcha.
En entamando a subir pa onde la cueva, ya baxaben la mayoría de los pilotos, que-yos prestaba munchu venos llegar tan tarde, llegamos a la rotonda y baxamos nosotros, que llegamos xustu pa cuando sacaben la tarta na espicha. Llueu de la espicha, como somos unos llambiones, fuimos los mios compañeros y los nuesos pas a un merenderu en Piloña pa acabar de fartucanos, como manda la tradición.

Nun se los kilometros que fici, ni lo que tardé, ni el pulsu que llevé, pero paselo bien, aunque pola mañana pensara nel agua, nos kilometros, na velocidá que diben dir los demás…al final na más que fui de marcha.

Diba ser un día épicu, con meta a 1520 metros d’altor, allá onde acaba lo conocíu. Esti miercoles 19 alcontramonos Nardín y yo per Viella, y con Jurgën, Danilo y Xingu en El Berrón. La Gargantá en sin priesa y llenamos los botes na baxada. Garramos Nalón p’arriba, que siempre ye mui prestosu, hasta pasar La Pola pa cruzalu pel puente La Chalana…eso si que presta, aunque esta vez nun canté al pasar, canté al parar na fuente Entrialgo. De la que recargábemos pasó una grupeta con un faltosín que nun se que decía de bolses…

Tomamos camín pa Villoria y pescamos a la grupeta d’antes, llueu de tenelos pasaos volvió a soltala el faltosín, qu’amás debe ser graciosu. Tolivia y entamamos la xubía. Los dos primeros kilometros son duros y Jurgën y Xingu, nun ataque de valentía, tomen la delantera, yo nun voi finu y sigo la rueda Danilo, Nardín vien tamién. Paso un relevu, pasa Nardín y queda atrás pa nu subir munchu’l pulsu. Sigue tirando Danilo y vamos viendo a los escapaos. Tiro y nos acercamos, Nardín vien manteniendo la distancia, tenemoslos a tiru y baxo un diente, pescamoslos baxo dos dientes y arranco fuerte, demasiáu fuerte, siento alguien detrás, Jurgën y Xingu, subo piñones y mantengo’l ritmu, quedase Jurgën, ya tamos llegando y se que Xingu va ganame al esprint, un diente menos, avanzo, miro y voi sólu, cuando ya me confío meto’l piñón grande y miro con tranquilidá’l cartel: La Collaona 850m.

Reagrupamos y vamos pa Cabanaquinta, remontamos el ríu Ayer, pocu a pocu, vamos ganando metros, Felechosa, agua, Cuevas y entama’l puertu , queden 11 kms hasta’l Puertu Braña (p’allá del cordal ye santu). Hai aire, de sur, pero paez qu’equí arriba ye más frescu. Yo voi sin ganes, Jurgën sin fuercia, Nardín nun se como va, pero nun va munchu; Danilo tira de nosotros, ye’l que más ganes tien de llegar arriba. Xingu nun tien tantes ganes, pero a la gueta d’una ya tradicional esplosión, vase sólu. Nostros mantenemos un ritmu cómodu, qu’entovía queda. Pa Jurgën nun ye tan cómodu y quedase un pocu, pa volver pescanos y volvese quedar. Tamos no más duru, un kilometru de casi un 10% de desnivel, pasamosu y vemos al fondu la nube, chispea, ta negru arriba, hai que (more…)

El vienres pela tarde ñació un plan. Tal vez nublaos pola influecia del mate, tal vez peranimaos pola facilidá del deporte na play, marcamos la ruta. Lo únicu non suxetu a variables: a les 9:00 en La Gruta.

A les 8:30 pongome’n marcha, de manga y pierna corta, con un periódicu’n pechu, confío’n que llevante la ñebla, y que eses gotes que noto de vez en cuando, nun seyan nada.”ya pue abrir” pienso cuando veo llegar al restu con alguna chaqueta, mangues y perneres; si non, la que m’espera va ser fina.

Ponemos rumbu a Trubia, pa xirar a la esquierda direición Proaza, sigue zarráu, cuando nun se como, en dexando atrás una peña apaez un cielu azul, en sin rastru de nubes. Paez qu’entamamos a calentar…

En Caranga decimos adiós a la ruta que teniamos pensada el vienres pela mañana, Cobertoria y lo que viniera pela cuenca.

Vamos pa Teberga, La Plaza, unos 7 kilometros suaves parriba, hasta llegar a La Cueva Güerta, onde una baxadina nos planta de repente nuna rampa del 12%. Dexamos que marche Pupilo y que lu intente seguir Ornimans, pa que se crezan. Sete, Gon y yo decidimos tomanos los 13 kms al 7,2 que falten con calma, disfrutando de la vista, como se suel dicir. Ye un puertu comodu, polo menos con un 25 atrás, pero hai que llevar agua, qu’hasta casi arriba nun ves una riega de la que se pue beber, y mas arriba entovía un bebederu.

Al paecer hai unes vistes perbones arriba’l puertu (y más fontes), pero los retrasaos nun nos merecemos disfrutales y hai que tirar prontu pabaxu, nun sea q’anocheza.

Pa mi idea que falta otru trozu de señal

Tal vez seya el mes d’escasu entrenamientu que llevo, los menos de 300 kms que fici la semana pasada, pero yo creo que lo que peor mi sento, fue’l aire’n pasando’l cordal. De Ventana a Barrios de Luna la verdá que nun tien munchu misteriu la cosa, rectu pallá, hasta pasar por debaxu esi puente que tantes veces cruzamos y en seguida desviase pa onde diz Pola de Gordón.

Equí la falta de riegu produz cierta tensión, sobretou viendo pa onde xube la carretera. Facemos un asaltu per dos frentes a La Aralla cola esperanza (more…)

inauguro la web con una bona caleyada. Nun son pocos los que saben lo que me presta la zona Fuensanta, nun hai meyor escusa que dir a llenar el bote pa aprovechame y, pocu a pocu, meteme per eses caleyes.

una d’elles, la que xube direcion al mayau pastor ya ta mediu esplorada, aunque espero que pal veranu puea llegar lo más arriba posible. Pero’l otru día dime cuenta de la pista que va paralela al ríu, nun se si ye que taba cegáu cola pendiente de la que va monte arriba, pero el casu ye que hasta’l otru día que fui con ales nun me meti por ella, pero sólu vimos el principiu, hasta dexar atrás la nave de la embotelladora.

por fin, el sábadu, cola compañia de Ania y Armando, pusi rumbu a fuensanta cola intención de siguir esi camín, que según los cartelos, habría llevame a Piloñeta siguiendo’l cursu’l ríu Pra, pasando pel palaciu La Ferrería.

Cruzamos la puente y garramos el camín de grava fasta una portiellona que va dar al palaciu.

al paecer ye del opus y de veranu van ellí guah.es de campamentu. Así a primera vista paecerá un rollu, pero ye que al llau’l palaciu hai una piscina, una panera, una cancha tenis, picaderu caballos…

Dempues de dar unes vueltes per ellí sin saber pa onde tirar, decidimos desmontar de les burres y dir per un camin de piedra monte pallá. En cuantu pudimos montar otra vez, alcontramonos con un cruce… ania piensa que lo meyor ye dir pa la derecha, a ver si salimos del bosque, pero viendo un senderín de menos d’un metru d’anchu, llenu fueyes y oricios a la izquierda…. la decisión taba clara.

(more…)