Sigues una llinia nel horizonte, lloñe, camines en sin prisa, la llinia avanza igual (ye d’esperar, si dixera que tengo una muyer atravesada ente los párpados sería igual d’orixinal), pero non, un día, una hora, un instante, la llinia vien pa contra tí, ya nun ti fae caminar, faite correr, tou ye velocidá, sumense la tuya y la de la llinia, ya nun ves alredior, sólu los tos pies, los tos puños, una gota sudor que puede coles tos ceyes, y la llinia.

Sientes un españíu,nun sabes d’onde, van ser mil, dientro. Nun ye l’horizonte el corre más allá, nin siquiera ya nun lu veías, imposible d’enfocar tras de la nitidez de la llinia, ye la tierra, el suelu que queda por correr el que se abre, crez, separa, nun pues facer nada, ya nun sirve correr, esnalar ye imposible. Separaisvos, sin nada que poder facer, irremediable, la llinia la traga la tierra, cuando falte la xente queda la tierra, pero nun reconforta, aun sabiendo que la llinia, de lo fonderu, va intentar xubir arriba, al suelu que tú pises, faciendose suelu que se mueva colos tos pies, como alfombra.

Pero ya nun ves nada, nun tienes rumbu que seguir, sabes qu’hai que seguir dalguna otra llinia, pero sabes que la tuya yera esa, sabes que puedes seguir otra, quiéslo, pero da miéu escaecer, cuando tou lo buenu ta nel recuerdu.

Entama la pretemporada, tiempu de previsiones y revisiones, un güeyu al mañana mientres l’otru mira l’ayer. La selmana que vien empezaré col ximnasiu, esta semana na mas que fice que caminar un pocu, media hora’l primer día, al otru una, hora y media, y güei hora y 40 minutos. Sali pal puente vieyu, garré la vía les canteres, y per ella voi hasta Llugarín, esquivo unos camiones y ya voi tranquilu per una carreterina hasta Quintana, más arriba ta Lladines, de momentu demasiáu arriba. Ellí taben una señora mandando callar al perru, y un señor con un carretilláu de mazanes. Hai bastante, pero tan cayendo ya toes y tan verdes entovía. La sidre tolos años tien un gustu distintu, será l’añu lo que-y da el sabor a la mazana?

Esti añu ta ácida, presta pero al final dexa un gustu raru, una corriente que atraviesa la mandibula d’abaxu arriba, los güeyos llorosos. Calló prontu, tando verde. Nesti tiempu, veíes la mazana nel árbol, sabiendo que va caer, pero pensando qu’entovía ta verde, tovía queda tiempu. Garres alguna, verde verde, ta ácida pero presta igual porque sabes qu’entovía nun ye’l tiempu, que ya tendrá tiempu a madurar. Pero nun maduraron, morrieron verdes, quedasti cola mandíbula ellétrica, los pelos encrespaos y los güeyos, la cara, salaos.

Asemeya a una escapada. Dempues del últimu post qu’escribí garré la escapada. Llevaba tiempu viendo’l recorríu, yera prestosu, y con recorríos así, casi nun fai falta esforzase pa pescar la escapada buena, lo guapu del recorríu que vas viendo faite dir en cabeza del grupu, y así, como quien nun quier la cosa, garres la escapada.

Al principiu cuesta echala palantre, hai repechos duros y notes qu’al restu la escapada cuesta-y pasalos, pero sabiendo que merez la pena, poneste a cola pa que la escapada suba al so ritmu. Pasaos los repechos, non sin esfuerzu, paez que la carretera ye llana, vamos a toa velocidá, pero pocu dura, pocu a pocu va garrando pendiente la carretera, y por atrás el pelotón se organiza y tira. Hai que facer un esfuerzu pa poder llegar a meta, pero golpe a golpe, atrás son mas equipos los que tiran, aumenta el so ritmu. Entós sabes que la escapada nun va llegar a meta, ye imposible.

Ye duru, sabes que la escapada nun va llegar, ye una escapada destinada a morrer. Pero ye tan prestosu que aun sabiendolo nun yes quien a desentendete, sigues sufriendo, tires tou lo que puedes, nun puede haber nada meyor que la sensación de la escapada, ye droga, nun puedes dexala, aunque de muerte mate. Pases relevu y por momentos olvideste de que nun vais llegar, imaxines el podiu, casi puedes tocalu. Tal vez pudieres llegar a dalguna meta volante, sería guapu, pero quien sabe si nun sería mas duru entovía que nun ver el podiu, subir a él sabiendo que nun yes el que ganó, imaxinando la gloria del ganador con muncha más fuercia qu’agora. Ye la carrera más importante.

Pero la escapada muer,  fai 24 díes llegó’l pelotón, fai 23 díes te pescó, alcanzóte, pasóte per enrriba, pisóte, nun fue la goma les cubiertes lo que te pisó, fueron les cadenes, los dientes de los platos, cada diente de cada un de los piñones, afiláu como una espina, lo que se clavó nel to cuerpu. Nun se ven les ferídes, son de les que más duelen, tan enbaxu la piel, el sangre quier salir y nun tien per onde.

 La escapada fue guapa, la meyor escapada del mundu, con tou y les ferides, que ya sabíes que diben venir, nun se puede tar meyor qu’escapáu. Pero esta escapada acabó contigo, tas machacáu, sabes que vas pillar más escapaes, pero agora nun tienes ganes, necesites tiempu pa recordar tolos detalles d’ésta, intentar curar las h.eridas, qu’escuecen, desencaxen la mandibula, faen saltar les llarimes, el sangre que nun puede salir pela piel salta pelos güeyos, ácidu, como la mazana, con sentencia en firme, destinada a caer, besarkada handi bat, laister harte.

Queden 15 díes pal primer oxetivu. Home, esto nun son oxetivos como’l que prepara’l tour, o sin llegar a tantu, la xente que de verdá disputa les carreres na mio categoría, la de plata. El casu ye llegar lo más fuerte que se puea.

Dempues de güei, un día de descansu, aun sin dexar d’entrenar, queden 15 díes y sólu una carrera, más o menos, esti ye’l plan pa d’equí a allá por díes:

-miercoles- series en subida, sin forzar a tope (87%, 174 pulsaciones por minutu), 1km col desarrollu mui duru y 500m mui blandu, 4 veces, lo xustu pa subir Santumiyano. Llueu rodar un pocu y volver a facelo.

-xueves- 4 /4 y media hores, col mesmu númeru de puertos más o menos. Forzando algo más nel final de los puertos (según como responda’l cuerpu, 188, 192, 195 ppm…)

-vienres- 3 / 3,5 hores por terrenu onduláu, apretando na más que un pocu en dalgún repechu.

-sábadu- lo mesmu que’l primer día, aunque toi viendo que siendo sábadu, ye fácil que se pueda allargar algo más el recorríu, o dir pa otros sitios. El casu ye facer les series, coles que se supón qu’amás d’ameyorar la fuerza (al subir con poca cadencia de pedaléu), ganase en facilidá a la hora de responder a cambios de ritmu (al subir con mucha cadencia; cuando vas atrancáu tas deseando de que pase esi kilometru, pero luego tas deseando de volver a dir atrancáu..)

-domingo- repítese’l segundu día, 4 hores y media con puertos, a ver si sal una ruta guapa.

-llunes-fondu, 5 hores mínimu, ente 5 y media y 6 ta bien. Sin forzar en nengún momentu. Hai qu’aprovechar que ye’l últimu día de vacaciones.

-martes- paecíu al vienres, sobre 3 hores de rodar tranquilamente

-miercoles- descansu, sin bici

-xueves, vienres y sábadu- agora ya ye tou descansar, el sábadu el día más suave, y ente’l xueves y el vienres suavín, pero un de los dos díes apretar n’algún repechín, dalgún esprin…

-domingo- competición en Cuellar, Segovia. Ye una carrera clásica del calendariu, llana, varies vueltes, un tramu d’adoquin suave en cada vuelta y meta nun repechu duru pero cortu.

-llunes- soltar un pocu les pates

-martes- como 3 hores, suavín.

-miercoles- ye’l día de marchar, hai munchos kilometros, asi que día de furgoneta, si nun hai que madrugar munchu, 20 minutinos de rodillu

de xueves a domingo, Volta a Castelló

Mañana entama la temporada ciclista elite y sub.23 en cantabria, y por cercanía, pal mio equipu. Pa mi la temporada espero qu’entame la semana que vien allá per Zamora. Esto ye porque tuvi tou lo que va de mes casi en sin entrenar, por culpa la gripe y la sinusitis, así qu’esti fin de selmana déxolu pa entrenar.

Esti añu paez que ye diferente pal equipu, renovando toa la equipación, bicis, algún patrocinador nuevu… como tolos años entamamos con muchu ánimu, agora na más falta que el asfaltu nos cuente lo que-y paez a él, si hai que seguir col ánimu, aselar un pocu, o ponese pletóricos. Al final, lo más fácil, aunque habrá que intentar cambiar, pasaremos l’añu teniendo pola pelleya…

Dexo esto de momentu, a ver si dalgún día tengo daqué que contar más entreteníu, mañana a entrenar tou lo que se pueda, o dexe’l tiempu; y güei a descansar que tampocu nun tuvo mal l’entrenu.

Nieru.

Buenu, ya…que ta mal tiempu, paez que ya va meyorar, que nun ye esi, que ye’l otru el qu’anda mal, buenu, el tiempu non, el que anda mal soi yo, pero mal con él…

Si tien arreglu, se arreglará

Nun hai munchu que contar, tamos en tiempu de “descansu”, rexenerando l’organismu. Rutes en bici nun fici casi ninguna, y lo que anduvi nun ye pa contalo. A pie puedo contavos… que xubir l’Angliru nun creo que mereza la pena, asfaltu hailu al salir de casa y vistes…hai bien de sitios con vistes iguales o meyores, con una ruta más prestosa.

Pa facer una ruta prestosa, sin dificultá, y nel centru d’Asturies, recomiendovos la que se puede entamar nel hípicu d’Uviéu (en Llanera) El Asturcón. Saliendo pela ruta que rodea les instalaciones del hípicu, podemos, en llegando al final (unos 2 kms), seguir pol camín anchu que indica a Lladines, en cruzando un regatu de un buen saltu (olvidai esta parte los que disfruteis del goretex) entama una subida con bastante pendiente que nun para hasta llegar a Lladines. Pasando un par de cases tenemos el cruce que nos lleva a Brañes, aunque bien podemos tirar un pocu de frente per onde dibamos pa beber na fuente (yo nun fui y pasé sede).

D’equí de Lladines tamien podemos xubir pal Naranco per unos caminos guapos, pero nun se caminando lo que llevará de tiempu, eso sí nun deben tener perdida.

Volviendo al cruce, garramos l’otru camín, direción Brañes, aunque creo qu’el pueblu que indica ye otru (nun m’alcuerdo d’el). El camín ye tou llanu o baxando, nun siendo dalguna ondulación suave, lo que nu quier decir que nun canse, que hai una cuesta que apetez echar a correr…

El camín acaba de momentu n’esi pueblu que nun se agora como se llama, teniendo un cachín de carretera, que seguimos sin pérdida hasta un cruce con un camín que va pa la derecha mientres vemos baxando. Entramos per él y lu seguimos, viendo al otru llau parte de la cantera y la carretera que llega allá. Una vez n’esti camín, nel par de cruces que hai, hai que se fijar nes indicaciones que tan pintaes pelos murios, teniendo en cuenta que indiquen la ruta en sentíu contrariu; amás hai que mirar pal suelu, nun entrando pel camín que tenga una raya blanca marcada (de toes formes, si faes como yo y nun te das cuenta, si ves qu’el camín acaba y tienes que seguir pel prau…nun lo intentes, a nun ser que quieras ver un pocu el ríu o caminar per una llamarga).

Siguiendo’l camín, entamamos a perder altura, acercandonos cada vez mas al ríu, el camín tien peor firme y hai más charcos, hasta que de repente vas ver quél camín sigue pel ríu…nun hai problema, tornes pa la izquierda y cruces el regatu. Ya nun queda mas que llegar a un cruce que ya vas ver familiar, y seguru que nun t’equivoques, si nun quies volver a xubir a Lladines… D’equí al final ye dar la vuelta per onde salimos, aunque hai dos caminos que vancasi paralelos, bien indicaos nos cartelos.

De la duración de la ruta nun vos puedo decir esactamente, yo salí caminando dende Posada y tardé 4h 20′…quitando igual dos hores d’ida y vuelta per carretera, saliendo del hípicu pueden salir 2 hores y media, si nun fallo nel cálculu…lo meyor: nun tener prisa.

Acabó’l tiempu la carretera y llegó la hora del monte. Dempues de 9 meses pedalenado pela brea, vien bien pisar un pocu en blandu. Llevo dos semanes dando paseinos a pie, nunca más de 2 hores, pel Naranco, Santufirme, montes bien guapos y cercanos, lástima que nun haiga koalas, porque podíen montar un par de parques temáticos de la austra.

Ayer ya fue distintu, salimos los del equipu y fuimos a la ruta les xanes, una ruta fácil, con algo de xente (l’añu pasáu más), pa entamar nun ta mal, amás, según el ritmu, pue facese dura. Como la ruta en sí, igual yera pocu, salimos de Tuñon y fuimos a onde tan los osos, la verdá tampocu hai munchu que ver, unu na piscina, l’otru allí tiráu… total, que como somos unos gallos, y nun respetamos a los mayores del grupu, xubimos unes escaleres a un mirador qu’hai ellí, son cortes, pero pindies y la verdá qu’arriba nun hai muncho que ver, a nun ser que te preste ver praos grandes y planos, entos pues facer como yo y sacar un par de fotos. Esta priemra subida ya sirvió de calentamientu y se vio que Zamarra nun diba finu, cosa que quedo confirmada cuando entamamos la ruta les xanes. Al principiu paecía que Caiman diba facei compañía, pero fue parar y echar un mexu, y ya nos pillo la aspiración, dexando a Zamarra sólu, como cuando llego escapáu a Los Carriles con 15 minutos de ventaja, y nun solu-y los recuperaron, encima dexaronlu atrás.

Llevando la mitá la ruta, hai un desvíu a la izquierda, pa metete un pocu más pel monte y nun subir pelos pasos arreglaos. El final per esta variante ye durísimu, un prau que nun acaba nunca, viendo na mas qu’el cielu. Como somos unos flipaos, y yo lo sé, pusi un ritmu fuerte dende abaxu, alq ue sólu respondieron Caimán (nun se que llevaría nel bote, menuda recuperación) y Sete. Pensé que diba ser más dificil, pero al final nun ficieron mas qu’esprintar pol segundu puestu.

Comimos, descansamos, ficimos alguna foto entretenía… y baxamos. Pa baxar vamos pola ruta marcada, que nun ye tan pindiu y ya vamos mas relaxaos y podemos facer un pocu mas el tontu.

Calculo que saliendo del aparcamientu de Tuñón, hasta onde los osos, y vuelta pa les xanes pa baxar otra vez a Tuñon, caminariemos 4 hores mas o menos. La parte d’enbaxu ye pista fácil y ancha, pue dir cualquiera y con cualquier calzáu, ye cemento. Les Xanes tien unes vistes mui guapes, sobretou la primera parte hasta qu’entes pa ente los árboles, ehí ye guapu, pero sin vistes. Puede facese en playeros, namás qu’hai un cachín húmedu pa pasar con cuidáu, y arriba hai prau de sobra pa echase a gustu, que ye lo que presta.  Debe haber otra ruta que va de Pedroveya a La Rebollada y baxaper Pandiellu a Proaza, pero eso nun lo tengo pisáu.
Fotos nun tengo, porque nun se como, pero se me veló la memoria…

Desperté sintiendo llover, pensé n’esperar el cuartu d’hora que quedaba hasta que sonara l’alarma, pero al pocu levanteme a asomame pela ventana. Llovía bien, pa tar sin camiseta na ventana a les 7 la mañana nun taba fríu, taba fresquino, prestaba. Ente la oscuridá del cielu paecía que queríen salir claros ente les nubes.

Almorcé y volví a la ventana, ya pintaba meyor la cosa, vestime, garré la bici y tiré pa Fran. Dempues de dos semanes sin entrenar, con una semana santa pel mediu, paez que va unu raru na bici, aunque fici trampa y antes d’ayer salí a dar una vueltina pa mover un pocu la manivela. Voi pa Uviéu y m’alcuerdo de cuando la xente flipa cuando digo que fui a casa mio güela en bici, que ye pocu, que tenía qu’haber entrenáu más. Pensando no que me queda güei, doi más valor a la xente que se prepara pa dir a algún sitiu mediu lloñe, que pa mi ye menos que un entrenu.

Llega la avenida del mar, meto un palancazu a la maneta pa subir una riestra piñones…pero sólu queda ún, va la cosa bien. Llego a Fran, bah, nun hai muncha xente, amaneció pa quedar na cama, la verdá. Nun llegué a tiempu pa la foto de la salida, quédame la de la llegada. Salimos a un ritmu bien cómodu, taba vistu que nun dibamos seguir así hasta allá, en pasando La Secá entamo la griesca, a pocu que te despistes pierdes rueda y quedes p’atrás, que ye lo que me paso a mi, igual qu’el añu pasáu, por Nava ya diba a relevos con una grupeta rezagaos.

Dibamos fuerte, a algúnu conocialu de vista, otru de rodar algún ratu perehí, otros de nada, otru yera’l mio primer entrenador, de tou, y  así un detrás del otru, fuimos lanzandonos y pescamos otra grupeta llegando a L’Infiestu. Ya quedaba pocu pal avituallamientu en Villamayor, nel polígonu de la recta de Lléu. Esti añu eché en falta unos bollinos con tropiezos de chocolate, pero nun m’atreví a decir nada.

Salimos de Villamayor y entama la cabera y definitiva parte de la “marcha”. Como ye normal en mi, quede falando con un paisano, que diba tiempu que nun lu veía, y cuando quisi salir taba l’últimu, con otru chaval. Bueee,  allá que fuimos los dos, que ya vimos enseguida que nun dibamos pillar a naide, falando de carreres, de marches, carreteres guapes, como la de Pedroveya, y resulta, que ya ye casualidá, que conocía esti blog. Por fin acabó la carrera y entamo la marcha.
En entamando a subir pa onde la cueva, ya baxaben la mayoría de los pilotos, que-yos prestaba munchu venos llegar tan tarde, llegamos a la rotonda y baxamos nosotros, que llegamos xustu pa cuando sacaben la tarta na espicha. Llueu de la espicha, como somos unos llambiones, fuimos los mios compañeros y los nuesos pas a un merenderu en Piloña pa acabar de fartucanos, como manda la tradición.

Nun se los kilometros que fici, ni lo que tardé, ni el pulsu que llevé, pero paselo bien, aunque pola mañana pensara nel agua, nos kilometros, na velocidá que diben dir los demás…al final na más que fui de marcha.

(semeyes y datos nuevos)

Dempués d’unos díes de descansu y un par de carreres que val más nun decir nada…el llunes volvimos a la competición, y de que manera, copa ñapaes del porvenir en Llugo Llanera. Ya diba tiempu que nun me ponía nerviosu pa una carrera, pero nun se si pol nivel de la carrera, por la cercanía, o pol baxu nivel de forma, la nueche antes ya taba nerviosu.

Tan nerviosu taba que nun fuí quién a dormime dempues de madrugar p’almorzar, como faigo tolos diés de carrera: llevantome 8 hores y 15 minutos antes de la carrera, almuerzo un platu pasta o arroz;, tortiella, filete o nada; colacao, kelos y actimel, ya sabeis, pa les defenses. Darréu vuelvo pa la cama, onde’l efectu d’una pesada dixestión faime sentir el celebru flotando na tiesta, cosa prestosa, y duermo hasta la hora comer. Ayer non, nun fui quién a dormime, asi que tuvi dende les diez llevantáu, tola mañana nerviosu.

A les cuatro y un pocu entamó la carrera, como de broma, en sin sibatu nin nada, vino unu y dixo: preparaos, listos, ya! y allá que fuimos, lo más selectu del peloton estatal, de los sub-23, el meyor de cada casa. Sin pensalo dos vegaes, arrancaron de salida detrás del coche que abría la carrera Jurgën, Pinto Pinto, y Nardín. Decia-y yo al Llocu Caravia que nun llegaben a Posada, pero sí, llegaron un pocu más allá.

Llegamos a San Cucao y paso p’alante, qu’entama la xubida a Bonielles, estirase munchu el pelotón, pero aguanto bien, vamos p’Arlós, xiramos a la derecha direción a los guixarros, segunda dificultá del recorríu, subila dos veces esta semana, una fuerte y otra a tope, agora más. Empiezo atrás y voi pasando, Sete derecha!, vamos Llocu! llego a cabeza y veo un grupín un pocu delante, tiro fuerte, miro p’atrás y sigueme’l pelotón, tiro hasta pescar a aquel grupu, abrome a la derecha pa controlar bien la carretera, arranca un Kelme, nun lo pienso y arranco, tamos casi arriba, el principiu la baxada ye malu, de dar munchu pedal y con aire, vien ún del Wurth y me pasa, damos algún relevu, pas! diome un bichu ente les gafes y el cascu, zas! picome n’una pierna. Seguimos los tres y nun se si diba otru con nosotros, salimos a la bascula, Posada y al salir vemos un grupín de 4 o 5, yo la verdá que nun sabía si había más xente delantre. Organizamosnos y llegamos a Llugo, direción Santufirme, pa Mundín, 300 metros agónicos, los dos llaos de la carretera llenos de xente, paez una clásica belga, sufro y ya veo quién ye el más debil de la escapada, yo. Baxamos pa Llugo otra vez y entamamos la segunda vuelta de cuatro que hai que dar p’acabar.

Cosa de los nervios, escaeciósemi meter comida pal bolsillu, entós, fui viendo a los que dibamos dando relevos, hasta que me decidí a pedi-y algo al más conocíu de toos. Diome un trozu mazana, di-y un mordisquín de nada, nun vaya ser lo únicu que coma en tola tarde. Entama el repechu Bonielles, seguimos a relevos, de repente al pasar unu, nun soi quien a llegar, nun llego, nun llego, abrome y me pasan toos. Intento que nun me saquen demasiáu pero nun puedo, el corazón va bien, pero les pates nun dan más, aunque nun me paecía que fueramos rápidu.

Bebo y echo un chorru a la picadura y ehi diba yo, sólu, na mas que veia coches, motos y carretera, toi acabando xubir pa Arlós, otru tragu y otru chorru, que vuelve picar. Voi empezar los guixarros y veo un kelme detrás, guardo alguna fuercia pa intertar seguilu, pescame y me pregunta pola escapada, el principiu debe ser lo mas duru y lu dexo que se vaya, llueu ya voi recuperando-y metros, miro p’atrás y vien un Wurth, a ver si vamos los 3 xuntos y podemos pasar solos por Mundín otra vez; paso al kelme, tiro un pocu más fuerte, miro p’atras y vien el Wurth, tiro, miro y veo al pelotón…Duré una vuelta, treinta y algo kilometros, pasanme unos cuantos y a recuperar a rueda, que diz Danilo que se va bien nel pelotón.

Paso Mundín mediu decentemente, ni en cabeza ni de culo, pel mediu, ta bien, sigo en pelotón hasta llegar otra vez a Bonielles, mi ma, esti repechu matame, volví a quedame, pero del pelotón esta vez, y lo peor ye que nun veo que se queden muchos mas. Baxando Bonielles y xubiendo p’Arlós voi ente los coches, tiro un bote mediu llenu pa garrar otru del coche y impulsame un cachu, voi a rueda y na baxada adelanto coches, entama la subida y otra vez los coches d’antes, garro comida y otru bote. Lo siguiente que garré foi la ventanilla, fui un cachín y pase unos coches, tan pasandome otra vez y siento: ventanilla! nun yera el mio coche, pero valía igual, otru poquitín. Entama la baxada y veo un León que debió usar la misma tecnica que yo, porque lu vi quedase delantre mía en Bonielles. Llegando a Posada entro otra vez al pelotón, acabo la mazana que mi diera el escapáu na primera vuelta y me agarro fuerte al manillar, que hai que dir pa Mundín otra vez,la tercera.

Esta ya ye demasiáu, nun aguanto al pelotón, por suerte muchos más tampocu, voi con Cerezo, pescamos a otru o otros dos, que se yo, si nun veía. Llega el llanu y me pasan, saquenme un pocu, vien el coche y se ponen a rueda, si hom, de que, si ye’l míu, meto-y manilar al que nun conocía y paso triunfal por meta a rueda d’un coche. Voi permal, dexanme atrás otra vez estos dos, pienso que ya nun me queden enerxíes, pero veo un grupín delante, unu ye Danilo, faigo un esfuerzu y coche a coche voi llegando hasta que los pillo. Alcontramos a Sete pinchaú esperando pol coche. Entramos pa la carretera Bonielles y pasa Sete como una moto, sacanos un pocu, mira p’atrás y espera. Empieza la subida y Sete, que taba de mala ostia, vase a rueda d’un ucranianu del kelme. En la grupeta nun aceptamos estos comportamientos y-yos gritamos un pocu: venga que ganais, ale valientes! Seguimos despaciu, Danilo sufre pero aguanta. Xubimos los guixarros, despaciu no, como podemos, miro p’atrás, pa ver si vien alguien non, pa ver si ta afayaizu pa garrase del ambulancia, pero van unos xueces con nosotros. Garro un bote d’agua arriba y otru una lata cocacola, que tomamos entre 4. Dicen los arbitros que o apuramos nel llanu o nos quiten.

Ya entramos pa la carretera Mundín, sólu queda una subida y baxar pa meta, danme un Xatu Roxu (sin azucar) abrolu y mi salta tou pela mano, un tragu, que asquerosidá, pa el que lu quiera. Esta vez ya nun había tanta xente viendonos, xubimos despacín, la vez que menos sufrí y ya por fin baxamos y entramos a meta.

3 hores y media, 130 kilometros mas o menos, duelenvos les piernes? a mi sí, entovía.

Lo rosa ye per onde se va, salida y meta en Llugo, en coloráu los tramos de subida importante.

Tardamos 11 minutos más qu’el primeru, a casi 9 entró’l últimu de la clasificación, nosotros (y algunos más, 12 en total) llegamos fuera control. Retiráronse 38 corredores y acabaron 55 (más nosotros 12, que tarde si, pero acabamos)

(El LLocu Caravia dempues de coronar Mundín l’añu pasáu, en espera d’alguna foto d’esti añu fecha pol Llucu Trespando.)